Документарниот филм „Денот да е радосен“ за македонскиот бенд „Културно уметнички работници“ вечерва ќе ја има својата премиера со почеток од 21 часот во кино Фросина. Повод за филмот е 15 години опстојување на бендот на македонската алтернативна музичка сцена.
„Денот да е радосен” е филм – доказ за постојаното инаетење на неколку музички поединци да не навлезат во кошот наречен музика за некаква намена, со некаков жанр, за некаква цел, за некаков надоместок.
Режисерка на филмот е Љубица Поповска, а е во продукција на „Аворд филм и видео“. Ова за неа претставува прв долгометражен документарен филм.
Филмот е во рамките на 13-то издание на фестивалот на европски филм „Синедејс“.
По премиерата на филмот, бендот ќе одржи концерт. Влезот за концертот е бесплатен.