Од 21 до 23 октомври оваа година, на Архитектонскиот факултет ќе се одржи тридневниот „Проект Скопје“ на кој архитекти од Јапонија, Холандија и САД повторно ќе разговараат за моќта на архитектурата и урбанизмот. Со овој настан ќе се одбележи 70 годишнината од основањето на факултетот и 55 годишнината од донесувањето на планот за реконструкција на центарот на градот Скопје на Кензо Танге.
„Основната цел на проектот „Скопје“ во 2020 година е да ја преиспита моќта на архитектурата и урбаниот дизајн како двигатели на реконструкцијата на општествата и градовите ширум светот. Проектот за Скопје беше одлична можност за светските архитекти од тоа време, на покана на ОН, да создадат навистина светски проект кој ќе ги промовира универзалните хуманистички вредности создадени низ архитектурата. Овој процес беше реализиран низ блиска соработка на врвните архитекти од целиот свет за создавање на светската визија за Скопје“ – вели проф. Д-р Огнен Марина, декан на Архитектонскиот факултет.
По педесет и пет години по изработката и усвојувањето на планот за реконструкција на Скопје, во Скопје со свои предавања ќе гостуваат архитектите Реинер де Граф од „ОМА“ студиото од Холандија, Су Фуџимото од Јапонија и проф. Чарлс Валдхајм од Харвард универзитетот во САД.
На „Проект Скопје“, посебни предавања ќе имаат и еминентните професори, Хаџиме Јатцука од Токио, експерт за делата на Кензо Танге, Дирк ван ден Хувел од Холандија, експерт за делото на архитектот Јап Бакема, Дебора Хаупман од САД, Инес Толиќ од Италија и професорката Анета Христова Поповска од Архитектонски факултет, која ќе говори за делото на професорот и архитектот Живко Поповски.
„Во октомври, после повеќе од половина век, светските архитекти повторно ќе размислуваат и дискутираат за Скопје, но сега не само како за град кој треба да се обнови, туку како парадигма и модел за соработка во создавањето на праведно општество и одржливи градови, нешто што се покажува како особено важно и во актуелната состојба во светот“, нагласува организаторот на настанот, деканот на Архитектонскиот факултет, Огнен Марина.
По разорниот земјотрес во 1963 година, кој остави повеќе од 80% од зградите во урнатини, Обединетите Нации вложиле исклучителен напор за реконструкција и редизајн на Скопје, поканувајќи во обновата да се вклучат голем број светски архитекти, меѓу кои Кензо Танге од Јапонија, Јап Бакема, Ван ден Брук од Холандија и Константин Доксиадис од Грција. Нивните проекти биле потврда на идејата дека модерните градовите и општествата можат да бидат проектирани и реконструирани преку идеи и концепти кои се својствени на архитектурата и урбанизмот, а притоа и се длабоко хуманистички.