По повод Светскиот ден на дивиот свет, утре (4 март, понеделник) од 17 часот на Факултетот за ветеринарна медицина во Скопје ќе се одржат предавање и проекција на филм за Балканскиот рис (Balkan lynx).
„Секој оној кој е заинтересиран да научи нешто повеќе за ова мистериозно и преубаво животно, е добредојден! Ве очекуваме!“, стои во најавата за настанот.
Балканскиот рис живее во планинските региони на Западна Македонија, особено околу националниот парк „Маврово“, како и на планините Мунела, Шебеник и Албанските алпи во Албанија. Според последните истражувања со фото замки, потврдено е негово присуство и во западниот дел од Косово. Рисот е предатор чијшто плен се срна, дива коза и зајак.
Инаку, настанот е во организација на три студентски организации, ИВСА,ИДСБ и ДРЕН, а поддржано од Македонско Еколошко Друштво.