Вчеравечер скопската публика имаше можност да ја проследи претставата „Црногорец во кревет“, најавувана како урнебесна комедија. Режисерот Пеѓа Шушкавчевиќ, го искористи познатиот стереотип за Црногорците – мрзлива нација, како идеја за двочасовна претстава.
По дваесетминутно чекање претставата да започне, на сцената се појави Лала Новаковиќ, која со подолг монолог го опиша нејзиниот тажен и досаден живот како жена на Петко. Имено, нејзиното секојдневие се состои од извршување на обврските на домаќинка, чекајќи го својот мрзлив маж да се врати од кафеана. А кога тоа ќе се случи, таа е изложена на низа зајадливи коментари и критики од негова страна: за нејзиниот изглед, за нејзината мајка, за фактот што само еднаш го конзумирале бракот, а потоа повеќе од 22 години – „суша“. Прикажано преку дијалог-караница, оваа претстава не и нуди ништо ново и забавно на публиката. Разговорите помеѓу сопружниците се монотони и досадни, а го прикажуваат стереотипот за типично балканско семејство, површно, како изведбата на Новаковиќ.
Петко, во изведба на Пеѓа Шушкавчевиќ, е мрзлив Црногорец, алкохоличар, кој ја мрази својата жена затоа што нема иста физичка градба како манекенка. Се труди тоа да и го повторува неколку пати на ден и го наведува како причина која што не му дозволува да ги извршува своите брачни должности, повеќе од две декади. Тој е љубител на пиењето, кој везден зборува за својот дедо, претставувајќи го како идеална личност. Освен што зборува и пие, не прави ништо друго, а неговата мрзеливост најдобро се прикажува во моментот кога пробува да и ја исполни желбата на сопругата да ја повторат нивната брачна ноќ. Успева само да ја соблече повеќеслојната облека и од премореност, веднаш заспива.
Шушкавчевиќ, освен со изведбата на Петко, своите таленти ги покажа и успешно справувајќи се со немирната публика чии мобилни телефони и зајадливи коментари не стивнуваа.
Оваа претстава изобилува со иронични и саркастични досетки кои го критикуваат општеството, политиката и балканскиот менталитет. Но тоа го прави на веќе виден и испробан начин, вметнувајќи во самите дијалози популарни мислења на луѓето од социјалните мрежи. И токму затоа „Црногорецот во кревет“ може да биде малку здодевен.
Александра Филипова