Секој вторник од 19 часот, на сајберфреквенцијата на интернет Радио МОФ започнува емитувањеро на „Поларис“ – нова радио емисија посветена на научната фантастика, фантазијата и хоророт. Во „Поларис“ ќе може да се слушнат најновите информации од светот на овие жанрови, ќе се рецензираат класични и актуелни наслови, ќе се одвојуваат специјални емисии за поджанрови, автори и настани, а се најавуваат и бројни гостувања.
Емисијата ја води Марјан Болтевски и е поделена на два дела. Во првиот дел ќе се презентираат најновите актуелности на филмската, литературната и гејмерската сцена од областа на „сај-фајот“, „фентези“ и хоророт. Во вториот дел ќе се одвојува време за рецензирање на актуелен или постар наслов, дискусија со фанови за нивните омилени дела, ќе се интервјуираат лица кои учествуваат во вакви уметнички и културни проекти и ќе се дава осврт за различни правци и автори кои оставиле значителен белег преку своите дела.
Ова е прва емисија во земјава која ќе се занимава со теми од овие специфични жанрови.
Во вечерашното, прво издание на емисијата „Поларис“, со почеток во 19 часот на Радио МОФ (radiomof.mk), централна тема ќе биде книгата Neuromancer на канадскиот писател Вилијам Гибсон.
Закачете се на Радио МОФ и дознајте зошто Neuromancer, првата сајберпанк книга и по 30 години од нејзиното издавање се уште има голема релевантност.