Подготвени над 300 оброци за Месецот на хуманоста

Ентузијастот за готвење Cooking with Branko (Бранко Попоски), во соработка со иницијативата Ретвитни оброк и здружението Љубезност успееја да предизвикаат голем број луѓе и компании да приготват 3 до 5 оброци за сума од 100 денари.

Сите заедно успееја да донираат над 300 оброци.

„Чувството на среќа, исполнетост и задоволство денес се многу големи. Толку многу што не можам и не знам на кој начин да ви ја искажам благодарноста што месец јули решивте да бидете дел од #месецнахуманост со Cooking with Branko, што го прифативте предизвикот за готвење и донирање на оброци, и што бевте хумани и што помогнавте барем малку да придонесеме за споделување на насмевки, љубов и топли прегратки преку топол оброк“, вели Бранко Попоски за сите оние што учествуваа во предизвикот како Димитар Атанасовски, Сара Мејс, Македонија Денес, Утринска на Телма, Снеже Велков, Јелена Спенџарска, Ване Маркоски, Коста Давид Петров, Александра Јанева, Николина Славковска, Јана Серафимова, Влатко Чаловски, Ивана Торес, Кристина Петровска Арнаудова, Eye Cue, Елена Стефановска, Валентин Петрески, Тина Мицковска.

Според Попоски, овој Месец на хуманоста не застанува.

„Поради овие дела сите ќе продолжат да бидат хумани и да им помогаат на оние на кои што им е најпотребно“, потенцира иницијативата Cooking with Branko.

Инаку, блогерот иницијативата ја почна објавувајќи видео преку кои повеќе јавни личности, изведувачи и граѓани ги повика да се приклучат на хуман предизвик – да направат 3 до 5 оброци со буџет од 100 денари, а потоа да ги донираат  за социјално загрозените семејства преку Ретвитни оброк и здружението Љубезност.