Преку онлајн петиција што се шири низ социјалните медиуми, граѓани почнаа да се потпишуваат за да се воведе евтина цена на струја додека трае вонредната состојба. До објавување на текстов имаше 4.121 собрани потписи.
„Опасноста од забрзано ширење на Корона вирусот е реалност. Затоа, ги поздравуваме здравствените мерки кои се преземени од страна на Владата и Министерството за здравство и наредбите за самоизолација на населението. Но, истовремено ја потенцираме опасноста од настанување нов проблем, а тоа е социјалната криза и сиромаштија која ќе ја предизвикаат здравствените мерки доколку не бидат навремено проследени со социјални мерки. Имено, задолжителноста на самоизолацијата, подразбира задолжително останување дома во текот на речиси целото деноноќие. Тоа значи повисоки режиски трошоци (повисоки сметки за струја, вода, греење итн.)“, се вели во петицијата.
Понатаму, пишува дека сето ова е во ситуација кога граѓаните остануваат без работа поради затворањето на голем дел субјектите од производствените дејности и сите услужни дејности. Исто така, сето ова е во ситуација кога сосема е за очекување да има семејства без ниту еден вработен во периодот кој престои.
„Затоа бараме од владата вонредната состојба да ја искористи преку донесување низа уредби со законска сила за помош на населението преку социјални трансфери. Но, пред да се донесат истите, неопходни се итни мерки кои треба да се донесат веднаш! Во прв ред тоа е воведување ефтина тарифа за струјата во текот на целото деноноќие, а со цел да се спречи негативниот економски ефект на самоизолацијата – зголемени износи на сметките за струја. Сметаме дека оваа мерка може да се донесе веднаш!“, стои во онлајн петицијата.