Наместо снег, во саботата на врвот на Гренланд за првпат заврна дожд, пренесува CNN.
Температурите на врвот на Гренланд, висок 2.600 метри, во текот на викендот се искачија над нулата по трет пат за помалку од една деценија. Топлиот воздух го поттикна екстремниот дожд кој заврна 7 милијарди тони вода на ледената плоча.
Според Националниот центар за податоци за снег и мраз, тоа било најобилниот дожд на ледената покривка од почетокот на евиденцијата во 1950 година, а количината на ледена маса изгубена во неделата била седум пати поголема од дневниот просек за овој период од годината.
Тед Скамбос, виш научен истражувач во Националниот центар за податоци за снег и мраз на Универзитетот во Колорадо, рече дека ова е доказ дека Гренланд брзо се затоплува.
„Она што се случува не е само топла деценија или две, во залутана климатска шема“, рече Скамбос за CNN.
„Ова е без преседан“, додаде тој.
Станицата на Националната фондација за наука се наоѓа на највисоката точка на ледената покривка на Гренланд, каде што научниците можат да го набљудуваат времето на Арктикот и промените во мразот. Станицата е екипирана преку целата година за да ги набљудува екстремните промени од 1989 година. Поголемиот дел од дождот викендов падна од југоисточниот брег на Гренланд до станицата на врвот.
Џенифер Мерсер, програмски службеник во Канцеларијата за поларни програми при Националната фондација за наука, рече дека поради значајниот дожд, операциите на станицата ќе треба да се променат.
„Тоа значи дека треба да ги земеме предвид временските настани што не сме ги имале претходно во историјата на нашите операции таму“, рече таа за CNN.
„Зголемувањето на временските настани, вклучувајќи топење, силен ветер и сега дожд, во последните 10 години се случи надвор од опсегот на она што се смета за нормално“, рече Мерсер. „И овие се чини дека се случуваат се повеќе и повеќе“.
Како што климатските промени предизвикани од луѓе ја загреваат планетата, исто и загубата на мраз брзо се зголемува. Главниот извештај на ОН за климата објавен овој месец заклучува дека согорувањето на фосилните горива доведе до топење на Гренланд во текот на изминатите две децении. Една неодамнешна студија објавена во списанието „Криосфера“ покажа дека Земјата загубила неверојатни 28 трилиони тони мраз од средината на 1990-тите, од кои голем дел бил од Арктикот, вклучително и ледената покривка на Гренланд.
Во јули, Гренланд изгуби повеќе од 8,5 милијарди тони површинска маса за еден ден. Тоа беше трет случај на екстремно топење во изминатата деценија.
Во 2019 година, Гренланд испушти околу 532 милијарди тони мраз во морето. Во текот на таа година, неочекувано жешка пролет и јулски топлотен бран предизвикаа да се топи речиси целата површина на ледениот слој. Глобалното ниво на морето се зголеми трајно за 1,5 милиметри како резултат.
Зачестија и други невообичаени настани, вели Мерсер.
Пред две години, поларна мечка стигнала до станицата на врвот, што било невообичаено бидејќи поларните мечки живеат во крајбрежните региони каде што лесно можат да најдат храна. Мечката патувала неколку стотици километри во внатрешноста низ ледената покривка. Во последните пет години, Мерсер рече дека три поларни мечки се видени високо на ледената покривка на Гренланд.