Изложбата „Мојот универзум“, со која Националната галерија на Македонија (НГМ) го одбележува Меѓународниот ден на лицата со посебни потреби, од денеска е отворена во галеријата Чифте амам.
Изложбата е работена по моделот социјална инклузија. Станува збор за ликовни работилници кои НГМ ги организираше во соработка со три средни училишта – скопските гимназии „Орце Николов“ и „Јосип Броз Тито“ (учениците од Меѓународна матура) и училиштето „Партенија Зографски“ за деца со оштетен слух и говор. Изложбата на изработени дела ќе може да се посети во наредните денови.
Ова е првпат на ваков начин Националната галерија да го одбележува овој ден.
„Ние, како Национална галерија на Македонија, ги отвораме вратите кон ранливите категории и организираме изложби. Една од нив што ја организираме со години е по повод Светскиот ден на аутизмот“, истакна Маја Димитрова, едукатор во Националната галерија на Македонија.