Овој викенд по шести пат во Градски парк ќе се случи Скопје Стрит Фестивал, улична платформа за развој на субкултурата во Скопје. Фестивалот и оваа година ќе биде без карти, отворен за посетителите, и ќе вклучува пет стејџа: графити, стрит бол помеѓу познати скопски кафулиња, денс стејџ, музички стејџ.
Фестивалот, во организација на агенцијата Подиум, започнува на 8-ми Јуни во 17 часот и ќе трае до 9-ти Јуни, 01.00 часот.
Организаторите најавуваат одлично, шесто издание, со огромен број на креативни, забавни и едукативни концепти, врзани на една платформа која урбано го буди Скопје. Скопје Стрит Фестивал во изминатите шест години беше домаќин на повеќе од 200 артисти од Македонија, регионот, а и од светот и повеќе од десетици илјади посетители.
На ова шесто роденденско издание на главен музички стејџ ќе имаме можност да ги видиме Funk Shui, САФ со 20 години Скопска Ситуација и виртуозниот продуцент Кирил Џајковски заедно со MC David Lion. Програмата е надополнета со супер листа на македонски диџеи меѓу кои: Чваре, Маци, Флудер, Мартин Војдановски, Страјк.
Повеќе информации за Фестивалот може да најдете на официјалната фејсбук фан страна или на веб страната www.ssf.mk.