Фестивалот на свежа домашна музика „Земјотрес“ ќе се одржи на 1 февруари од 19 часот во Младинскиот културен центар (МКЦ).
Организаторите велат дека „Земјотрес во Скопје удира токму во миговите кога луѓето ќе го изумат чувството за заедништво“.
„Кога ќе снема минимален заеднички интерес, кога моралот не е во мода веќе. Фестивалот ‘Земјотрес’ е ритуал за јакнење на заедништвото на квалитетната македонска музичка сцена, со желба да покажеме релевантна содржина во време на инстант потрошувачка и вредности вон континуитет. Генерациите, музичките стилови, па и идеалите се менуваат, но алтернативната културна понуда е есенцијална за поттикнување на духот на новите, се побројни сограѓани со пософистицирани естетски потреби“, соопштуваат организаторите.
Според најавите, „Земјотрес“ е директна комуникација помеѓу генерациите, музичките стилови и навидум различните интереси на нашите музичари.
„Широка платформа за презентација на едно постоење, но и постојана промена. Некомерцијален манифест во интерес на духовната и економска оправданост на нашето музичко шаренило. Вашето присуство е директна инвестиција во солидна иднина. Придружете ни се, заедно сме сцена. А, да…и сила“, се вели во најавата за фестивалот.
Во 8-мото издание на фестивалот се најавени настапи на: BarumBarum, Blackstate, Conspiracy, Culture Development, Daktili, Dragi Ivanov, DS Collective, Filch, Флукс, Galatheia, Last Expedition, Mirko Popov, MvrSvr Production, PMG Kolektiv, Robotek, Sashko Kostov, Sethstat, Shock Troopers, Svetlost, Vidinovski, Voltaire Mani Al Hakim и Zulu 3.4.