Во стариот дел од скопскиот Градски парк на 21 април (недела) ќе се одржи настан именуван „Очи во очи со непознат“.
„Велат очите се прозор на душата. Ова е дефинитивно настан кој го потврдува тоа. На кратко, Визуелниот Експеримент е глобален настан кој ја промовира човечноста и нашата изгубена врска со самите себе, и помеѓу себе. Често слушаме (и чуствуваме) како сме осамени повеќе од било кога, покрај сите социјални медиуми кои ги користиме. Целта на овој настан е да го измени статус квото и да не потсети на најчистата и најискрена форма на не вербална комуникација – очи во очи. Седиме на Земја, ги ставаме телефоните настрана и за најмалку 60 секунди го споделуваме контактот очи во очи со целосно непозната личност наспроти нас. Без зборување“, стои во најавата за настанот.
Иницијаторите велат дека можеби звучи малку страшно, и ако некој не го пробал досега навистина и е.
„Но, ќе откриете дека ова е една од најдобрите и најчисти работи која можете да ја споделите. Ако останувате подолго и сакате да ви приоѓаат луѓе, препорачливо е со себе да понесете черга, перниче или нешто на што ви е пријатено да седите. Постери се исто добредојдени“, се вели во најавата за настанот.
Инаку, настанот e најавен од 13 часот околу јапонската цреша, во близина на голема корпа со љубичици во стариот дел од Градскиот парк.