Основниот кривичен суд Скопје денеска ги прогласи Љубе Крстевски и Бранко Билбиловски за виновни за убиство на кучето Феликс, кое почина на 7 јануари годинава како последица од нанесените повреди.
Судот на Крстевски му одреди казна затвор од три месеци, додека Билбиловски е санкциониран парично, односно треба да плати сто дневни глоби со вредност од 10 евра по глоба или вкупен износ од 1.000 евра.
Делото, според обвинителниот акт, осудените го сториле на 19 ноември минатата година. Тогаш Крстевски, без оправдана причина, користејќи тврд предмет налик на стап, повеќепати го удрил кучето во пределот на главата, нанесувајќи му потрес на мозокот и хематоми.
Потоа заедно со Билбиловски го врзале кучето со жица и влечејќи го го фрлиле во контејнер, мислејќи дека животното е мртво.
Кучето Феликс почина на 7 јануари во Јавното претпријатие „Лајка“ каде што вработените се обидоа да го спасат од сериозните повреди на главата, но не успеаја.
Обвинителството по девет дена, односно на 16 јануари, соопшти дека е поднесено обвинение против двајцата осомничени за случајот, кој привлече реакции во јавноста.
Делото за кое се товареа Крстевски и Билбиловски беше квалификувано според членот 233 став 1 од Кривичниот законик, кој предвидува парична казна или затвор до три години.
Судијката Лидија Петровска при изрекувањето на пресудата рече: „Изрекувањето на ефективна казна затвор има значење за заштита на јавниот интерес и ќе превенира слични постапки во иднина. Се работи за дело што предизвика висока јавна чувствителност и морална загриженост особено во контекст на зголемениот број на случаи на суровост кон животните. Со изрекувањето затворска казна се испраќа порака дека ваквите постапки нема да се толерираат и дека секој граѓанин има обврска за хуман однос кон животните“.
По пресудата, од иницијативата Зелен Хуман Град (ЗХГ) посочија дека е добиена првата затворска казна за убиство на куче во историјата на Македонија.
„Активистите за заштита на животни повторно испишаа историја! Пресудата е жив доказ дека да се биде активен граѓанин се исплати, промените се случуваат! Кога се бориме против неправда тоа има ефект!“, соопштија од ЗХГ.
Според „Анима мунди“, ова не е само судска одлука, туку правна пресвртница.
„Недоволна – да. Но гласна, недвосмислена и прва. И нема да остане последна. Оваа пресуда испраќа суштинска порака: дека животното не е предмет, дека насилството ќе носи последици. Дека владеењето на правото не е празна флоскула, туку мора да има вистинска тежина – особено кога општеството е сведок на системско молчење и отсуство на одговорност. Дека повеќе не може секој монструм да гази, убива и мачи без последици“, објавија од „Анима мунди“.
