Новите дечки на македонската бас сцена во сабота во Капан ан

На 4. мај (сабота), во скопскиот клуб Капан Ан ќе продефилираат новите надежи на македонската бас сцена, во рамките на вечерта насловена “New Kids On The Bass“. Пет диџеи, со просечна возраст од 21 година, ќе ги презентираат најважните стилови на современата бас музика – брејкбит, драменбејс и дабстеп. Присутните ќе имаат прилика да уживаат во сите бои од спектарот на прекршените ритмови – од ведриот џангл, па ликвид фанк, преку динамичниот биг бит, сѐ до мрачните дарк степ, тек степ и неуро фанк.

Simon Dread (Симон Кипровски, 23), Fuschism (Бојан Поповски, 23), Kesko (Владимир Кесковски, 18), Areni Musashi (Никола Стојановски, 21) и Hi.kick (Христина Илиевска, 20), ќе пилотираат со микс-пултот во Капан Ан. Овие момчиња и девојки се иднината на македонската бас сцена, чие ново поглавје се испишува токму со овој заеднички, револуционерен настап. Имено, оваа банда ѝ пркоси на синтагмата „Иднината останува на младите – кога ќе остарат“. За овие млади луѓе – иднината е сега.

„Нивната младост и малиот диџејски стаж нека не ве залажуваат. Овие дечки знаат добро да ја „запржат“ атмосферата и да го размрдаат подиумот. Тие доаѓаат – силно и самоуверено“, велат оганизаторите и најавуваат богата вечер во секоја смисла – нови аспекти и нови музички текстури. Дефилето започнува на полноќ, а место на подиумот чини 100 денари. Журката се реализира благодарение на MJM – Macedonian Junglist Movement, а на иницијатива на Скопје Вавилон – нова форма на активизам, која обединува креативни умови и стимулира активности за одржување и унапредување на културниот живот на Скопје.