„Нетфликс“ работи на опцијата да им овозможи на гледачите сами да го изберат крајот на ТВ серија

Компанијата „Нетфликс“ соопшти дека работи на идејата да им препушти на гледачите сами да го одредат расплетот на приказната во една телевизиска серија – принцип сличен на оној околу детските книги од 80-те: „Избери ја својата авантура”.

Овој концепт прво ќе биде испробан на детски серии до крајот на 2017 година и ако се покаже како успешен, ќе биде применет и кај програмите за повозрасната публика.

Според извршните раководители на компанијата, краевите на сериите ќе се снимаат во повеќе верзии, а гледачот со своето далечинско ќе може да бира која да го гледа.

– Ќе видиме како сето тоа ќе изгледа во реалноста и дали ќе биде успешно. Станува збор за експеримент и една целосно непозната територија за продуцентите“, изјави претставник на „Нетфликс“.

Сепак, ова и не сосема нов „изум“. Кај ДВД изданијата на голем број филмови веќе со години има опција „алтернативен крај“ во додатоците.

Но, како секоја друга нова идеја, така и оваа има свои поддржувачи и противници. Оние кои не се согласуваат овој концепт сметаат дека на тој начин ќе се намали значењето на креативноста на авторите и нивната оригиналност.