Најмалку 27 Палестинци беа убиени, а десетици ранети од израелски оган во близина на точка за дистрибуција на храна во јужниот дел на Појасот Газа денеска, соопштија локалните здравствени власти, пренесува Гардијан.
Ова е трет ден по ред од слични инциденти, додека Израел се обидува да воведе нов режим на дистрибуција на помош во Појасот Газа, кој го блокира со недели.
Израелската војска соопшти дека нејзините сили отвориле оган врз група лица кои ги напуштиле одредените пристапни патишта во близина на дистрибутивниот центар во Рафа.
Новинарите не беа во можност независно да го утврдат бројот на жртви, но Ројтерс објави дека портпарол на Меѓународниот комитет на Црвениот крст изјавил за новинската агенција дека нивната теренска болница во Рафа примила 184 жртви, додавајќи дека 19 од нив биле прогласени за мртви по пристигнувањето, а осуммина починале од повредите кратко потоа.
