Германскиот новински магазин Дер Шпигел објави дека еден од нивните најпознати новинари повеќе години пишувал лажирани стории.
Се работи за наградуваниот новинар Клас Релотиус, кој според неделникот, „измислувал стории и протагонисти“ во најмалку 14 од 60 новински стории кои се појавиле во нивните печатени или онлајн изданија, предупредувајќи дека и други медиуми може да биле опфатени со овој скандал.
33-годишниот Релотиус дал отказ откако ја признал измамата. Тој пишувал седум години за магазинот и освоил бројни награди за истражувачко новинарство, меѓу кои и наградата за Новинар на годината на Си-Ен-Ен во 2014 година.
Претходно овој месец тој ја освоил германската награда за Репортер на годината за неговата сторија за мало момче од Сирија, кое жири комисијата ја пофалила поради нејзината „поетичност и релевантност“. Дури потоа било откриено дека сите извори на информации во репортажата биле сомнителни и дека поголем дел од она што новинарот го напишал е плод на негова фантазија.
Лажирањето било откриено откако неговиот колега Хуан Морено, кои заедно работеле на сторија на границата меѓу САД и Мексико, се посомневал околу детали во приказната на Релотиус.
Морено успеал да пронајде два лика, кои биле повеќе пати цитирани во сторијата објавена во ноември. И двајцата му рекле дека никогаш не го сретнале Релотиус. Подоцнежната истрага открила и дека тој лажел кога напишал дека забележал рачно напишан знак со порака „Мексиканци стојте подалеку“.
Меѓу другите лажни стории биле и една за затвореник од Јемен во Гвантанамо, или пак за ѕвездата во американски фудбал, Колин Каперник.
Во подолг текст, магазинот Шпигел кој продава околу 725 илјади примероци месечно и има онлајн база на читатели од 6,5 милиони луѓе, соопштиле дека се шокирани од откритието и дека се извинуваат на читателите и на било кој што бил предмет на лажираните цитати, измислени лични детали или фиктивни сцени и места. Тие додале и дека формирале посебна комисија која ќе ги истражи сите новинарски дела на Релотиус за неделникот.
Магазинот е основан во 1947 година и е препознатлив по нивните квалитетни истражувачки стории.