Скоро деценија од најавата на моделот за интегрирано образование во Македонија, колку денеска сме поблиску или подалеку од целта која требаше да ја постигне овој концепт? Колку училиштата го надминуваат, а колку го продлабочуваат јазичниот и етничкиот јаз помеѓу младите, а колку политиката помага или одмага во тој процес? Зошто придвижувањето на ова важно прашање главно е оставено на невладиниот сектор?
На овие прашања, овој четврток (7 декември), во 13 часот, дискутираме во седмата епизода #НаЧас, серијалот дискусии за подобро образование. На темата „Интегрирани или сегрегирани училишта?“ ќе разговараме со Флорим Реџепи од ЦИД Куманово, Фатош Усаинова од Ромски ресурсен центар, Небојша Мојсоски од МЦГО и професорот Абил Бауш.
Дискусиите „На час“ – за подобро образование се емитуваат секој четврток, во 13 часот, со аудио пренос на Радио МОФ и видео пренос на нашата Фејсбук страница. За сите прашања, коментари и забелешки на Твитер активен е и хаштагот #НаЧас.
Периодот кој следи наговестува дека ќе се случуваат многу значајни промени во образованието, а со цел да се добие видливост и отвори дебата на предложените политики го започнуваме овој тематски серијал посветен на образованието. Радио МОФ е младински медиум кој ги има како главен фокус: студентските и средношколските права, студентскиот стандард и создавањето на политики во образованието. Токму затоа, опширното, сликовито и сеопфатно информирање на јавноста за теми поврзани со образованието и животот на учениците и студентите го сметаме за еден од приоритетите.
Серијалот „На час“ е финансиран и се спроведува во партнерство со Фондација Отворено општество – Македонија.