Во првите два месеци 123 млади лица се вработиле преку пилот проектот „Гаранција за млади“, кој се спроведува во три општини во Македонија, соопштија од Министерството за труд и социјална политика (МТСП).
„Првичните резултати од пилотирањето на проектот се охрабрувачки. За само два месеца, речиси 700 млади од 15-29 години се вклучиле во „Гаранцијата за млади“. За 640 од нив, направен е индивидуален план за вработување, 220 веќе биле вклучени во други услуги за вработување како што се: мотивациски обуки, обуки за барање работа, професионална ориентација и кариерно советување. Од пријавените, 123 млади лица веќе се во работен однос, а од останатите 60% аплицирале за некои од програмите/ мерките за вработување како на пример: 59 во Програмата самовработување со грант, 86 во Програмата за субвенционирање на плати, 73 во Обуки за побарувани занимања на пазарот на трудот, 73 во Практикантство и сл“, наведуваат од МТСП.
„Гаранцијата за млади“ започна со имплементација во март 2018 година како пилот проект во три општини: Град Скопје, Гостивар и Струмица и планирано е да трае во текот на целата година. Врз основа на анализа на постигнатото во пилот фазата, проектот ќе се имплементира на целата територија на Република Македонија.
Целта е на младите лица од 15 до 29 години, во период од четири месеци, да им се обезбеди шанса за вработување, континуирано образование и обука или практикантство.
Проектот се спроведува од Министерството за труд и социјална политика, Агенцијата за вработување на Македонија и Националниот младински совет на Македонија, а финансиски е поддржан од Швајцарската амбасада во Скопје.