МОН: За екстерното тестирање на матурантите 283 приговори, 130 прифатени

До Државниот испитен центар (ДИЦ) биле доставени 283 приговори за резултатите од екстерното тестирање на матурантите, за кои рокот за поднесување заврши вчера. Тие до ДИЦ се процесуирани од училишните комисии.

МОН: За екстерното тестирање на матурантите 283 приговори, 130 прифатени

– Врз основа на извештајот што го добив денеска од Државниот испитен центар, 130 приговори се прифатени, 133 се одбиени, а за останатите 20 ќе се одлучува по извештај од Државниот просветен инспекторат. Многу е мал процентот на поднесени приговори што е уште еден доказ и потврда дека екстерното овој пат помина без проблеми и забелешки, изјави министерот за образование и наука Спиро Ристовски по посетата на ОУ „Ѓорче Петров“ во Скопје.

Прифатените приговори се од две училишта во Куманово и Гостивар од каде што и се очекувале приговори поради пропусти во верификацијата на распоредите на првото од двете тестирања.

– Беше направен пропуст во однос на наставниот јазик на кој учениците ја следат наставата и на тие ученици им се прифатени приговорите, појасни министерот Ристовски.

Годинава екстерно тестирање имаше за 21.854 матуранти. Просечната оценка на тестираните матуранти од 96 средни училишта во Македонија е 3.39.

Најдобри резултати постигнале матурантите од гимназијата „Раде Јовчевски-Корчагин“-Скопје, а следни се: „Јосип Броз-Тито“-Битола, уметничкото „Лазар Личеноски“-Скопје, „Орце Николов“-Скопје и „Гоце Делчев“-Куманово на петтото место.