Министерството за образование и наука им честита на тимот предводен од Сојузот на хемичари и технолози на Македонија за освоениот бронзен медал на 49-та Интернационална хемиска олимпијада во Натхон Патхом, Тајланд, каде учествуваа од 6- до 15 јули. Исто така, им честита и на Друштвото на физичарите на Република Македонија, за бронзениот медал освоен на 48 Меѓународна олимпијада по физика во Џогјакарта, Индонезија, која се одржуваше од 16 до 24 јули.
Покрај нив, им честитаат и на претставниците од Сојузот на математичари кои освоија бронзен медал на 58. Меѓународна олимпијада по математика во Рио де Жанеиро, Бразил од 13 до 23 јули.
„Постигнатиот резултат претставува успех не само за сојузите, односно друштвата, туку претставува и успех за Република Македонија. Со постигнатите резултати тимовите на хемичари, физичари и математичари, покажаа и докажаа дека Република Македонија има млади луѓе, ученици, научници кои стојат рамо до рамо со своите врсници од целиот свет. МОН е во исчекување на резултатите од 29. Meѓународна олимпијада по информатика на која учество зема тимот од Здружението на информатичарите на Република Македонија (Техеран, Иран 28 јули – 4 август 2017)“, се вели во соопштението на МОН.
Оттаму информираат дека има предвидено доделување на парична награда за освоен медал на една од 13-те меѓународни научни олимпијади на ученикот и на наставникот кој го подготвувал ученикот за олимпијадата.
„Исто така, Министерството за образование и наука изразува жалење што досега младите таленти од Република Македонија не беа поддржани од институциите во однос на покривањето на патните трошоци или пак подготвителните часови. Известуваме дека, министерката за образование и наука проф. д-р Рената Дескоска и нејзиниот тим работат на изнаоѓање на системско решение за надминување на овој проблем преку нови законски решенија кои ќе бидат поддршка и мотив за учениците и нивните ментори во освојувањето на највисоките признанија на светските натпревари“, велат од МОН.