Сојузот на извидници на Македонија (СИМ) денеска во Кичево ќе ја одржи централната прослава по повод одбележувањето на Денот на извидниците.
На настанот се очекува учество на извидници од повеќе градови низ државата, кои ќе се соберат на едно место за заедничко одбележување на овој значаен датум.
Во рамки на програмата предвидено е свечено давање на извидничкиот завет, со што младите членови и официјално ќе ја потврдат својата посветеност кон извидничките вредности – другарство, солидарност и служба на заедницата. Организаторите најавуваат и пригодна културно-забавна програма, која ќе вклучува музички и рецитаторски настапи, како и активности во духот на извидништвото.
Од СИМ информираат дека целта на прославата е да се зајакне заедништвото меѓу извидниците и да се промовираат позитивните вредности кај младите. Настанот е отворен за јавноста, а организаторите упатуваат покана до граѓаните да присуствуваат и да ја поддржат работата на извидниците.
