На 17, 18 и 19 март, Младинскиот културен центар во Скопје, во соработка со BRIDGES, ќе биде „домаќин“ на филмскиот фестивал „Eurovideo 2015” кој е организиран од страна на „Videographies“ и Фондацијата „Монс 2015“.
„Оваа т.н. „Евровизија за кратки филм”, ќе се одржува во Театарот во Белгискиот град Лиеж, а тридневната манифестација ќе биде симултано пренесувана во Café Europa локалите во Монс, Сараево, Скопје, Сан Себастијан и Калининград“, се вели во соопштението.
На програмата се 24 кратки филмови кои доаѓаат од 17 различни Европски држави, а меѓу нив е и краткиот македонски филм под наслов “I want to abuse” на младата режисерка Наташа Неделкова.
Според организаторите, паралелно со натпреварувачката програма, ќе се одвиваат и трите “Carte blanche” (ненатпреварувачки) програми „Ludwig Forum” од Ахен кои на оригинален начин ќе ја прикажат видео арт историјата на Германија, Белгија и САД, „Duplex 100m2” од Сараево кои ќе отворат посебен видик кон различната и културно богата видео арт заедница во БиХ, како и „Tabakalera” од Сан Себастијан кои ќе го прикажат победничкото видео од нивниот последен Фестивал на Филмските академии.
Првите два дена се гласачки и натпреварувачки кога по проекциите, секој од публиката ќе има можност да гласа за петте најдобри филмови од селекцијата. Третиот ден е прогласувањето на наградените и прикажувањето на победничките филмови.
Најдобрите во категоријата Films and Videos ќе имаат можност да се здобијат со наградите „The Innovation Award for Technology or Treatment (1.500€)”, „The InnovationAward for the Most significant content (1.500€)” и „The European Audience Award (1.500€)”, каде Македонија е во конкуренција за European Audience Award наградата.
Проекциите се бесплатни и ќе се прикажуваат во Café Europa – Skopje, лоцирано во кафулето во МКЦ со почеток во 20.30 часот.