Метузалем е риба која сака да јаде свежи смокви, ужива да ја чешкаат по стомакот и се верува дека е најстарата жива аквариумска риба во светот, пишува АП.
Во Библијата, Метузалем е дедо на Ное кој живеел до 969 години. Рибата Метузалем не е баш толку древна, но биолозите од Академијата на науките во Калифорнија веруваат дека е стара околу 90 години, без познати живи врсници.
Метузалем е австралиска, т.н. белодробна риба долга 1,2 метри, тешка 18,1 килограми, донесена во музејот во Сан Франциско во 1938 година од Австралија. Таа е примитивен вид со бели дробови и жабри и се верува дека ја претставува еволутивната врска меѓу рибите и водоземците.
Не е толку непозната за публицистиката. Првото појавување на Метузалем во весникот „Сан Франциско Хроникл“ беше во 1947 година, со објаснување: „Овие чудни суштества – со зелени лушпи кои изгледаат како свежи листови од артичока – на научниците им се познати како можна ’алка што недостасува’ меѓу копнените и водните животни“.
Фото: АП
До пред неколку години, најстарата австралиска белодробна риба беше во Аквариумот Шед во Чикаго. Но, таа риба, по име Дедо, почина во 2017 година на 95-годишна возраст.
„По дифолт, Метузалем е најстарата“, вели Алан Јан, постар биолог на Академијата и чувар на рибите. Негувателите на Метузалем веруваат дека рибата е женка, иако е тешко да се одреди полот без ризично вадење крв. Академијата планира да испрати мал примерок од нејзината перка на истражувачи во Австралија, кои ќе се обидат да го потврдат полот и да ја дознаат точната возраст на рибата.
Јан вели дека Метузалем сака да се чешка и гали по грбот и стомакот и дека е „спокојна“ личност.
„Им велам на моите волонтери, преправајте се дека е подводно кученце, многу меко, нежно, но секако ако се исплаши ќе има ненадејни напади на енергија. Но, во најголем дел таа е само мирна“, рече Јан.
Метузалем развила вкус за сезонски смокви.
„Таа е малку пребирлива и сака смокви само кога се свежи и во сезона. Таа нема да ги јаде кога се замрзнати“, рече Жанет Пич, портпаролка на Академијата на науките во Калифорнија.
Фото: АП
Академијата има уште две австралиски белодробни риби кои се помлади, за кои се верува дека се на возраст од 40 или 50 години, посочува Јан.
Австралиската белодробна риба сега е загрозен вид и повеќе не може да се извезува од австралиските води, па биолозите од Академијата велат дека е малку веројатно дека ќе добијат замена откако Метузалем ќе умре.
„Ние само ѝ ја даваме најдобрата можна грижа што можеме да ја обезбедиме и се надеваме дека ќе напредува“, рече Јан.