Во склоп на програмата на фестивалот „Џифони“ се одржаа мастер класови на младите режисери Леон Ристов и Мартин Чичоски, кој беше придружен од актерот Вања Тројачанец.
Тие несебично ги споделија своите искуства од филмски проекти, со цел да ја охрабрат публиката. Прв мастер-клас вчера одржа режисерот Леон Ристов, кој со својот краток филм „Ќе му се јавам на татко ти“, учествуваше и на престижниот Сараевски филмски фестивал годинава.
Леон Ристов
Леон раскажа за идејата на филмот, кој го третира врсничкото насилство.
„Се сетив на една приказна од моето детство што се случи и помислив на многу други слични приказни што се случиле во моето соседство. И сфатив дека тоа кога бевме деца ни изгледаше многу нормално, а во суштина не е во ред. Тоа што се случува во филмот не ги изненадува гледачите на Балканот, но верувале или не, ги изненадува луѓето од други места што го гледале. Филмот го снимив во моето маало, од емотивни причини. Го избрав тој наслов на филмот, како реченица која кај нас внесува страв кај децата. Јас сум обожавател на неопходни дијалози во филмовите и избирам да се зборува на суптилен начин на филм и да не користам вишок реплики“, истакна Ристов.
Тој на идните филмаџии им даде неколку корисни совети, посочувајќи дека посетувањето работилници, мастер-класови, дружењето со млади со слични интереси ќе им го покаже патот.
„Кога и да одам на работилници, секогаш ни велат дека имате камера и имате сѐ. Јас бев дел од „Џифони Италија“ и „Џифони Македонија“. Тие ми отворија врати, ме приближија до филмот. Барајте курсеви, работилници, учествувајте. Ако имате проблем да работите сами, можете да побарате помош. Многу е важно да сте опкружени со луѓе што ги интересира филмската уметност. Со луѓе со сличен интерес, ќе најдете начин да работите заедно и да се поддржувате“, нагласи Ристов.
Мартин Чичовски и Вања Тројачанец одржаа мастер-клас во кој фокус беше ставен на нивната средношколска серија „Тремор“. Во неа третираат многу важни теми – насилство меѓу младите, дискриминација на ЛГБТ-лицата и силување. Нивната дискусија предизвика големо внимание кај присутните.
„Го избравме насловот „Тремор“, зашто станува збор за емоција која секој лик во секоја епизода ја споделува и провејува цело време. Добро е кога може да се инспирирате од реалноста и да ја претворите во филм. Сакаме да ги убедиме луѓето да зборуваат за сите овие приказни што ги имаме. Имаме епизода и на тема силување. Со секој нов филм имате поголеми очекувања, па вообичаено кога се прават првите филмови лесно е да се изморите од целиот процес“, сподели Чичовски со публиката.
За младиот актер Вања Тројачанец секој нареден проект значи големо искуство.
„Ние не се плашиме од критика, веруваме во пораките што ги создаваме. Многу луѓе на наша возраст, а и повозрасни се жртви на дискриминација. Ние не се плашиме да покажеме дека има ЛГБТ-заедница во Македонија, на пример“, изјави Тројачанец.
Публиката синоќа ја проследи проекцијата на британската комедија „Ослепен од светлината“, а во склоп на програмата апочнаа и разновидните работилници, кои продолжуваат и денес.
Мастер-клас со пренос во живо во 17 часот на фејсбук-страницата на Џифони ќе одржи Сергеј Сарчевски, студент по филмска уметност во „Вестминстер“ Лондон, а еден час подоцна ќе следува мастер-клас на млади вклучени во програмата „Докуникулци“ која е дел од фестивалот „Македокс“ од Скопје.