По повод Меѓународниот ден на човековите права, во Цреша Бар овој вторник, со почеток во 20 часот, петмина поети ќе настапат на поетската вечер под наслов „Стихови на слободата“.
Настанот е во организација на невладината организација Цивил, а меѓу поетите што ќе читаат свои стихови се Игор Исаковски, Јовица Ивановки, Илир Ајдини, Мирослав Стојановиќ – Шуки и Џабир Дерала. Поетите ќе ги придружува диџејски сет и видео арт, а со своето учество ќе го одбележат денот на човековите права.
– Ова е „машко друштво“ на поети и уметници и за првпат во историјата на Цивил има ваков тотален родов дисбаланс, што е иронична порака сама по себе. И со оваа поетска вечер на човековите права Цивил и уметниците ќе испратат порака до сите граѓани на Македонија и светот. Секако, во духот на слободата, програмата вклучува „отворен микрофон“, по настапот на учесниците во програмата – соопштуваат организаторите.
„Стихови на слободата“ инаку е заеднички наслов на поетски и мултимедијални перформански во организација на Цивил во рамките на проектот „Проговори!“- уметниците за човекови права и солидарност, финансиран од Министерството за надворешни работи на Сојузна Република Германија.