Според последното рангирање на моќта на државните пасоши, Северна Македонија се најде на 47-мото место, што ја става земјава некаде на средината на табелата во која се застапени вкупно 199 различни светски пасоши според новиот Индекс кој го изработуваат Хенли и Партнерите .
Со македонскиот пасош без виза можат да се посетат 123 држави, а во споредба со минатата година државава има пад од две позиции на глобалното рангирање.
Од регионот најмоќни пасоши имаат Грција (8-мо место) и Словенија (11), а пред С. Македонија се наоѓаат и Бугарија (18), Хрватска (20), Србија (39) и Црна Гора (46 место). Од македонскиот, послаби пасоши имаат Босна и Херцеговина (52 место), Албанија (54) и Косово (99).
На светско ниво азиските држави го преземаа приматот како предводници според силата на пасошите, додека европските пасоши паднаа малку пониско на рангирањето.
Најмоќен пасош во светот има Јапонија, чии граѓани можат безвизно да патуваат во вкупно 191 земја во светот. Во првите пет се наоѓаат и Сингапур, Германија, Јужна Кореја и Финска.
На последните пет места се наоѓаат Пакистан, Сомалија, Сирија, Ирак, а последен е Авганистан со чиј пасош може без виза да се посетат само 26 држави.