Македонската филхармонија најавува богата и атрактивна програма за новата концертна сезона 2015/2016 година. Како што соопштија од Филхармонијата, публиката ќе има можност да присуствува на актуелните остварувања на стандардната концертна програма, на новите и старите музички творби на македонската симфониска музика, како и на светските премиерни дела.
И годинава, посочуваат од Македонската филхармонија, ќе бидат донесени врвни солистички и диригентски имиња од светската и од домашната музичка сфера. Новата концертна сезона ќе започне на 1 октомври со концертот насловен „Маратон Брамс“, на кој под диригентство на маестро Даниел Рајскин од Русија, како солист ќе се претстави извонредниот Алексеј Володин, еден од најбараните пијанисти на денешницата. Тој во иста вечер ќе изведе два концерти за пијано и оркестар од Јоханес Брамс, што е вистински раритет во концертната практика.
Рускиот виолончелист Александар Књазев, руската виолинистка Алина Ибрагимова, пијанистот од Бугарија Евгени Божанов, сопранот Голда Шулц од САД, рускиот пијанист Евгениј Корољов, Сајака Шоџи на виолина од Јапонија, се дел од годинашните солистички ѕвезди. Освен маестро Цанев и Саша Николовски-Ѓумар, зад оркестарот ќе застанат извонредните Емил Табаков (Бугарија), Јануш Пшибилски (Полска), Кејс Скалионе (САД), Дорон Соломон (Израел), Тимоти Редмонд (Велика Британија)…
Македонската филхармонија во новата сезона најавува и нов циклус насловен „Алхемија“, кој подразбира нов концепт на концерти во кои се содржани сосема различни дела во однос на жанровската и стилската определба. Годинава на „Алхемија“ ќе се претстават Џо Пауерс на усна хармоника од САД и Ави Аватал на мандолина од Израел. Целта е токму овие концерти да понудат програмски концепт кој ќе отскокнува од стандардниот. „Фантастичен бутик“, „Виолината на Алина“, „NY vs NY“, „Некој ме гледа романтично“, „Клецмер фешта“, „Црн бран“, „Островска инспирација“ се дел од насловите на концертите кои ќе донесат навистина возбудлива програма, дела од Сен-Санс, Росини, Брух, Менделсон, Гершвин, Лист, Малер, Равел, Чајковски, Прокофјев, Мархулетс, Шостакович, Моцарт, Џон Адамс, Бетовен, Вивалди, Бритн, Вила-Лобос…
Во новата сезона Македонската филхармонија, ќе бидат понудени и други атрактивни концерти како „NY vs NY“ кој ќе се одржи во духот на новогодишните празници, или „Некој ме гледа романтично“ по повод Денот на вљубените. Триесетина симфониски концерти всушност, се дел од новиот репертоар на Македонската филхармонија, меѓу нив и традиционалните – симфониски концерти за деца, божикниот и велигденскиот концерт, концертите на учениците и студентите од музичките образовни институции и се разбира, циклусот „Кирилица“ кој ќе ги претстави актуелните остварувања на македонските музички уметници.
Под наслов „Наследство“, а под палката на маестро Саша Николовски-Ѓумар, ќе биде реализиран јубилеен концерт посветен на двајцата македонски композитори Властимир Николовски (по повод 90 години од раѓањето) и Томе Манчев (по повод 65 години од неговото раѓање). На концертот „Вокални авантури“, пак, под диригентство на маестро Борјан Цанев како солисти ќе се претстават двајцата македонски и светски врвни пејачи – сопранот Ана Дурловски и басот и контратенорот Игор Дурловски, кои ќе изведат сплет од арии и дуети. Ќе биде реализиран уште еден концерт со македонски солисти, овој пат квартет дувачи од оркестарот на Македонската филхармонија, како и концерт на кој солист е нашата извонредна виолинистка Ана Кондратенко, концерт-мајстор на Македонската филхармонија. Уште двајца македонски истакнати солисти со светска кариера ќе настапат оваа сезона – Исмаил Лумановски на кларинет и Дритон Гаџа на виола.
Во текот на целиот репертоар ќе бидат изведени и творбите кои се победници на конкурсот на Министерството за култура за дела од областа на сериозната музика. Оркестарот на Македонската филхармонија и следната концертна сезона ќе оствари неколку гостувања во другите македонски градови, а меѓу нив предвидени се и два симфониски концерти за деца во Прилеп и во Битола.