Статусот на Македонија во рангирањето на Фридом Хаус останува непроменет и годинава. Земјата е меѓу ретките во Европа кои се водат како „делумно слободни“ во трите основни параметри на угледната организација: слободата, граѓанските слободи и политичките права.
Во сите три категории, Македонија има оценка 3- делумно слободна. Највисоката оценка 1 им се дава на оние со најдобри перформанси, а најлошата- 7 на тираниите и деспотиите од типот на Северна Кореја и слични држави, пишува Дојче веле.
Во регионот, ист статус како Македонија имаат само уште Албанија, Босна и Херцеговина и Косово, а на поширокото европско подрачје Турција, Украина и Молдавија.
На европско ниво, ланската година не бил забележан пад на стандардите. Според Фридом Хаус, повеќето земји на континентот покажале почит за демократските стандарди и граѓанските слободи, и покрај растечкиот национализам како одговор на напливот на имигранти. Авторитарни тенденции се забележуваат кај турскиот премиер Реџеп Таип Ердоган, додека подобрување на состојбата е нотирана во Италија благодарение на слободните и фер избори и подобрувањето во антикорупциската легислатива.
На светско ниво, најзагрижувачка е состојбата во Северна Африка и делови од Азија. Големо назадување во почитувањето на човековите права е забележано во Египет, Русија, Украина, Азербејџан, Венецуела и Индонезија.
„Некои лидери се потпираат на модерен авторитаризам, сакатејќи ја политичката опозиција, без да ја уништат, изигрувајќи го владеењето на правото за да одржат привид на ред, легитимност и напредок. Основно за модерните автократи е преземањето на институциите кои го поддржуваат политичкиот плурализам. Тие се обидуваат да доминираат не само во извршната и законодавната власт, туку и во медиумите, судството, граѓанското општество, економијата и безбедносните сили“, гласи дефиницијата на Фридом Хаус за овие ткн. модерни автократии.
На дното на листата, традиционално и годинава се земји каде човековите права и слободи се мислена именка: Северна Кореја, Централно африканската република, Сомалија, Екваторијална гвинеја, Сирија, Еритреја, Судан, Саудиска Арабија, Туркменистан…