Американски научници направија ракавица што го преведува знаковниот јазик во говор во реално време – потенцијално дозволувајќи им на глувите луѓе да комуницираат директно со секого, без потреба од толкувач.
Уредот што се носи има сензори што работат на четирите прсти и палецот за да ги идентификуваат секој збор, фраза или буква според американски знаковен јазик. Тие сигнали потоа се испраќаат безжично на паметен телефон, што ги преведува во изговорени зборови со брзина од еден збор во секунда.
Научниците од УКЛА, каде е развиен проектот, веруваат дека иновацијата би можела да овозможи полесна комуникација за глувите лица.
„Нашата надеж е дека ова отвора полесен пат за луѓето кои користат знаковен јазик директно да комуницираат со оние кои не го знаат знаковниот јазик, без да има потреба некој друг да толкува“, рече водечкиот истражувач Јун Чен. „Покрај тоа, се надеваме дека може да им помогне на повеќе луѓе и самите да го научат знаковниот јазик“, додаде тој.
Истражувањето е објавено во списанието „Nature Electronics“. Се проценува дека меѓу 100 000 и милион луѓе го користат американскиот знаковен јазик во САД. Ракавицата не го преведува британскиот знаковен јазик.
Истражувачите исто така додадоа сензори на лицата на луѓето кои го тестираат уредот – помеѓу веѓите и од едната страна на нивната уста – за да се опфати и изразот на лицето, како дел од американскиот знаковен јазик.
Чен рече дека уредот е полесен од досегашните системи за носење развиени во претходните обиди да се создаде опрема за преведување знаковен јазик во реално време.
Повеќе од 300 знаковни јазици користат повеќе од 70 милиони глуви луѓе ширум светот.