Министерството за образование и наука ќе организира државен натпревар за избор на најдобра веб страна за основните и средните училишта за учебната 2015/2016 година. Оттаму упатуваат апел до сите ученици да учествуваат на натпреварот, бидејќи квалитетот, оригиналноста на дизајнот и функционалноста на изработените страници ќе бидат пресудни за победа.
Веб страната треба да ја изработат редовни ученици кои ќе бидат предводени од најмалку еден наставник од училиштето, при што не смее да се користи готов урнек. Јавниот повик за избор на „Најдобра веб страна“ на веќе е објавен на страницата на Министерството за образование и наука и е достапен за сите основни и средни училишта во земјата. Краен рок за аплицирање е 31 мај, 2016 година.
Селекцијата и рангирањето во двете категории ќе ги спроведе Министерството за образование и наука во соработка со Бирото за развој на образованието и Министерството за информатичко општество и администрација.