На 25 февруари, во МКЦ, за прв пат ќе гостува големиот Mark Lanegan со бенд, во рамки на промотивната турнеја по повод новиот албум насловен Phantom Radio.
Марк Ланеган има речиси 50 години. Штотуку го објави својот нов албум насловен Phantom Radio. Тоа ќе биде неговиот деветти соло-албум, но ако ги сметаме соработките со Изобел Кембел (Isobel Campbell), Дјук Гарвуд (Duke Garwood) или со едната половина од The Gutter Twins (неговото тековно партнерство со Грег Дули (Greg Dulli)), или пак неговиот поранешен легендарен прв бенд Screaming Trees, тогаш таа бројка се движи некаде околу 20.
Познати се и неговите гостувања на албумите на Queens Of The Stone Age, како и на албумите на Mad Season, супербендот од Сиетел од средината на 90-тите кој беше составен од членови од познатите Alice In Chains, Pearl Jam и Screaming Trees. Марк Ланеган има еднократни соработки со музичари како UNKLE, Martina-Topley Bird, Moby, Soulsavers, Melissa Auf der Maur и Creature With The Atom Brain.
На оваа турнеја го придружуваат и изведувачите Duke Garwood од Англија и Lyenn од Белгија. Билетите се веќе во продажба на билетара на МКЦ. Првите 250 билети се продаваат од цена по 400 денари, по што цената на билетот ќе чини 600 денари, соопштуваат од МКЦ.