Со дела од Бетовен, Рахманинов и Стравински, кубанско-шпанскиот пијанист Леонел Моралес ќе се претстави вечерва на „Охридско лето“.
Него критичарите го опишуваат како изведувач со брилијантна техника, леснотија, елеганција и неверојатна прецизност во свирењето. Концертот е во црквата „Света Софија“ од 21 часот.
Моралес дипломирал на Универзитетот во Хавана, под менторство на пијанистот Франк Фернандез, инаку студент на еминентниот руски пијанист Виктор Мерзанов, следејќи го методот на традиционалната руска школа. По завршувањето и на постдипломските студии, Моралес се преселил во Шпанија, каде што почнал активно да настапува и да учествува на голем број национални и интернационални натпревари, на кои освојувал значајни награди. Настапувал во речиси сите големи музички центри во светот, каде што одржувал мајсторски школи.
Во најавата за концертот на Моралес, „Охридско лето“ посочува дека еден од поинтересните курсеви на пијанистот е оној на кој тој ги анализира и ги интерпретира сите 32 Бетовенови сонати.
Во текот на кариерата Моралес настапувал со некои од најзначајните оркестри во светот и соработувал со голем број реномирани изведувачи и интернационално признати диригенти, меѓу кои Виктор Пабло Перез, Макс Валдес, Михаил Јуровски, Александар Рабари, Жак Мерси, Франц Крејгер.