Вечерва, во просториите на Македонската академија на науките и уметностите ќе биде отворена изложбата на дела создадени од Остеновите уметници на годината во периодот од 2012 до 2015 година.
Секоја година, „ОСТЕН уметност на хартија“ прогласува 12 македонски уметници за Остенови уметници. Се покануваат уметниците од различни возрасни категории, разчлични стилови на уметничко делување, од различни делови на Македонија. Она што е обединувачко за уметниците на ОСТЕН е цртежот со ист формат: 110 х 190 см, кој според правилникот на манифестацијата треба да го направи секој од нив.
„Основната идеја е да воспоставиме манифестација преку која на македонските уметници ќе им оддадеме почит за успешно завршената професионална година. Со тоа сакаме да покажеме дека ги следиме случувањата на македонската сцена на визуелните уметности во целост, како и активностите на уметниците поединечно“, истакнуваат од ОСТЕН Скопје.
Меѓу 12-те уметници од тековната година, се доделуваат награда за животно дело, за остенов уметник на годината и млад уметник на годината до 40 години.