На Скопско лето вечерва ќе има изложба на Дренуша Палоши, од 20:30 часот во Културно-информативниот центар, и концерт на бугарскиот пијанист Димчо Величков, во Музеј на Град Скопје од 21 часот.
Денуша Палоши (Тетово, 1989) дипломирала на Факултетот за ликовни уметности на Државниот универзитет во Тетово. Изложбата ќе претстави дела во техниката акрил на платно. Насловена е „Музичка реминисценција во сликарството“ и ги одразува афинитетите на авторката кон двете уметности – музичката и ликовната.
Во Музејот на Град Скопје вечерва ќе се одржи и концерт на пијанистот од Бугарија, Димчо Величков. Дирекцијата за култура и уметност-Скопје го организира концертот во соработка со Културно-информативниот центар на Бугарија во Скопје.
На програмата се композиции од Александар Скрјабин, Красимир Ќуркчијски, Франц Лист, Александар Владигеров, Модест Мусоргски.
Димчо Величков (Стара Загора, 1987) потекнува од музичко семејство и од шестгодишна возраст почнал да свири пијано. Студирал пијано на Универзитетот за музика и уметност во Виена и магистрирал во 2015 година. Бил дел од симфонискиот оркестар „Блу џинс солист Виена“. Настапувал на концерти во повеќе европски земји, како и во Јужна Кореја и Канада, и учествувал на натпревари и фестивали во Бугарија и во странство.
Од 2017 работи како професор по пијано на Конзерваториумот „Франц Шуберт“ во Виена и во приватното музичко училиште „Шмид и Цетелман“. Добитник е на повеќе национални и меѓународни награди.