Активисти за човекови права од Иран изјавиле дека се загрижени за Ферхад Мејсами, затворен поради протест против обврската жените да носат хиџаб, кој започнал штрајк со глад.
48-годишниот Мејсами, кој бил доктор и издавач пред да стане граѓански активист, бил уапсен во неговата канцеларија во јули и бил затворен во озлогласениот затвор „Евин“ во Техеран.
По бранот протести околу хиџабот, иранските власти почнаа пресметка со активистите. Мејсами бил обвинет за поседување беџови на кои пишувало: „Јас сум против задолжителен хиџаб“.
Последниве месеци поголем број жени се уапсени поради нивен отпор на задолжителното носење хиџаб во јавност – стоејќи на телефонски говорници и симнувајќи ги своите шамии од главите и веејќи ги на стап. Движењето предизвика дебата ширум земјата околу правилото на задолжителност, на што се приклучија и група парламентарци.
Мејсами е обвинет за „соработка и заговор кој ја загрозува националната безбедност“, „дисеминација на пропаганда против власта“ и „навреда на хиџабот“, што претставува светост во исламот, посочуваат од новинската агенција на Иранските активисти за човекови права. Тој е обвинет и за „провоцирање на жени за да се појават во јавност без хиџаб“.
Штрајкот со глад на Мејсами е поради „неправедните обвинувања и недозволување на избор на адвокат“, изјавил за Гардијан негов близок соработник.
Во врска со протестите уапсени се и други активисти и правници.
„Дали сметате дека носење беџ на кој пишува „Јас сум против принуден хиџаб“ е криминал? Иранските власти мислат така. Тие го уапсија бранителот на човекови права Фархад Мехсами и го обвинија за кривични дела против националната безбедност поради поддршка на кампањата на иранските жени против оваа пракса на деградирање“, напишаа на Твитер од Амнести Интернешанл.
Do you think wearing a badge that says “I am against forced hijab” is a crime?
Iranian authorities do.
They’ve arrested human rights defender Farhad Meysami & charged him w/national security offences for supporting Iranian women’s campaign against this degrading practice. pic.twitter.com/I8YNzsAv8F
— AmnestyInternational (@amnesty) August 24, 2018
Затворени остануваат и десетици студенти откако беа уапсени оваа година поради учество во мирни протести. Оваа недела беше објавена информација дека Париса Рафеи, 21-годишен студент од Техеран, бил осуден на седум години затвор за „собир со намера да се дејствува против националната безбедност, пропаганда против власта и нарушување на јавниот ред“.