„Во сите четири периоди од годината се одвиваат најразлични процеси во природата. Зошто тогаш ние луѓето се осудуваме самите себе да правиме едно те исто, и денес, и утре и задутре?“.
Ова прашање си го поставиле младите Симона Николова и Борче Димитровски од Делчево, кои решија по завршувањето на студиите во Скопје сите одговори за својата иднина да ги бараат во природата.
Куќата која служи како еко-центар
Тие неодамна ги обраа првите плодови од нивната градина и ги испратија првите волонтери од странство кои летото им помагаа во средување на просторот во и околу нивната куќа во делчевско Стар Истевник.
„Она што нас најмногу не влече кон селото е изборот на активности што го нуди животот таму. Самата природа има потенцијал за најразлични активности и слобода со кои секој ден е една нова авантура, поразлична од вчера и утре. Сега, после две години работа на идејата, согледувајќи ги резултатите од направеното можеме да кажеме дека навистина сме мотивирани да продолжиме да се бориме за овие идеали и вредности“, велат Симона и Борче за Радио МОФ.
Симона Николова
Тие изминативе години се стремат да изнајдат што повеќе истомисленици со кои би разменувале идеи, би изнаоѓале заеднички решенија за разни предизвици и би споделувале искуство. Меѓу локалното население, пак, полека се пројавува љубопитност за настаните и луѓето кои доаѓаат во нивната градина и куќа.
„За да се отпочне една ваква идеја пред се е потребна храброст и желба да се вивнете во едно море од авантури, а не е потребно искуство. Искуството доаѓа преку работата. Традицијата и знаењето кои се уште ги има во локалното население во нашите села се добра подлога и среќата кога гледаат млади луѓе околу нив кои се полни со ентузијазам, дава дополнителна мотивација за да правиме работите да се случуваат“, велат Симона и Борче.
Неразвиената инфраструктура најголем предизвик за живот на село
Стар Истевник е на дваесетина километри од Делчево, во областа Пијанец. Покрај него тече Брегалница, а е заградено со планината Влаин. Како и најголемиот дел од селата во државата, и Стар Истевник се соочува со наглата миграција кон градовите.
Поглед од Истевник кон Делчево
Ова село им нуди на своите жители чиста планинска вода за пиење и чист воздух. Токму ова се предностите кои младите ентузијасти Симона и Борче ги согледале и решиле да ги споделат со секој кој има желба да се приклучи во создавањето на нивниот еко-центар „Природна перспектива“.
Изработка на куќа со природни материјали – акција која се одржа во Словенија, а Симона и Борче учествувале како волонтери
Во нивната градина ја негуваат пермакултурата, користејќи нови методи за одгледување најразлични плодови
„Самата инфраструктурална неразвиеност на руралните средини во нашата држава и запуштеноста на веќе постоечките системи го прави животот на село потежок од современит градски начин на живот. На село во летниот период се случува дома да имате вода по 2 часа дневно, а ви е неопходна за вашето домаќинство и вашата градина за целиот ден. За среќа, живееме на место каде се уште имаме чиста вода од селската чешма која ја користиме за пиење и лична хигиена, но која мора да ја земаме со садови за вода. Санацијата на старата куќа е исто така голем предизвик за нас поради тоа што сакаме да ја изведеме со старите техники кои се користеле овде и со локални природни материјални, а сакаме да ги изведеме сами. Затоа, летово посетивме неколку семинари за градење со природни материјали и сега следните чекори се токму во таа насока, да обезбедиме едни современи услови за престој во куќата, а сето тоа да го создадеме сами“, објаснуваат тие.
Борче извршувајќи ги дел од секојдневните обврски
Размислуваат за соработки со повеќе организации, а веќе се членови на организацијата „Надеж – Норе“ од Македонска Каменица, кои се подржувачи на младински активизам и се едни од првите кои им пристапиле со подршка за нивната идеја.
„Со нив заедно целиме да аплицираме во некои Европски фондови за подршка и развој на иновативни идеи и заживување на руралните средини во нашата држава од каде и самите доаѓаме“, размислуваат тие.
„Крајната цел секој ден се обликува и надополнува, но пред се веруваме дека сакаме тоа да биде еден начин на живот во кој ние како луѓе кои доаѓаме на оваа планета и се раѓаме како најразвиен вид, да оставиме позитивен импакт за целата планета и да си заминеме со мислата дека сме направиле нешто добро за сите“, се надеваат Симона и Борче.
Емилија Петреска
Фото: Природна Перспектива