Филип Радичевски е дипломиран графичар, со модул графички дизајн на Факултетот за ликовни уметности во Скопје. Тој работи на разни проекти од област на друштвени игри, видеоигри, корици за книги и музички албуми. Практикува дигитален, но и традиционален формат, како на пример скици со рапитограф, дела изработени со маслени бои на платно и цртежи со јаглен.
Учествувал на повеќе домашни и интернационални изложби и добиено неколку награди од кои се издвојуваат „СИАБ“ – VIII Студентско интернационално Арт Биенале и наградата „Лесковачка стрип смотра“ каде се здоби со признанието за втор најдобар илустратор за 2020 година.
„Инспирацијата ја црпам од повеќе работи и таа зависи од многу фактори кои несвесно влијаат врз моето уметничко изразување. Иако често ја менувам целта која што сакам да ја постигнам со делата, бројните влијанија кои ги имам често оставаат свој впечаток во секое дело. Претпознатливо е дека црпам инспирација од јапонските аниме цртани но исто така инспирација добивам и од музиката како и омилените ликовни уметници – Irakli Nadar, Nurzhan Bekkaliyev, Ilya Kuvshinov, Wlop, Guweiz, Wangjie Li, Bayard Wu, Lane Brown, Daniel Clarke“, вели тој.
Радичевски периодов се фокусира на создавање на дела кои ќе бидат лесно читливи и естетски привлечни за луѓето кои не се толку запознаени со уметноста, но како што вели, би сакал да содржат елементи кои се доволно креативни и кои пренесуваат длабока порака која би ги заинтригирала оние кои би посветиле поголемо внимание на делото.
„Најчесто се фокусирам на моралните пораки на делата и повеќеслојноста на концептите кои ја содржат апсолутната вистина. На тој начин пробувам да додадам поголема тежина и безвременска важност на делото. Исто така, сакам да додадам елементи кои би постигнале одредени чувства кои ги добиваме преку музиката, бидејќи подеднакво ми е импресивно кога некој музичар ќе успее да вклопи ликовни елементи во своето дело и би сакал да можам да го постигнам спротивното – моите дела да содржат музички елементи“, објаснува тој.
Радичевски е уште еден илустратор кој се приклучува на нашата иницијатива #ИнстаИлустрации. Во продолжение, погледнете дел од неговите илустрации:
View this post on Instagram
View this post on Instagram
View this post on Instagram
View this post on Instagram
View this post on Instagram