Во периодот од 5-ти до 11-ти октомври, Државниот пазарен инспекторат извршил 2.881 контрола и 290 надзори поврзани со почитување на здравствените протоколи за отворање и работа на кафетерии и угостителски објекти кои послужуваат храна.
При тоа, поднесени се 23 прекршочни пријави, 19 кривични пријави за непочитување на ковид протоколите за одржување свадби, дозволен број на маси, дозволено растојание и биле изречени се 5 решенија за други прекршоци.
За време на викендот без ДДВ, пак, инспекторите констатирале 15 прекршоци на Законите за трговија и за заштита на потрошувачите.
Државниот здравствен и санитарен инспекторат во истиот период извршил 126 надзори, при што биле издадени 3.929 решенија за изолација и домашно лекување на лица позитивни на Ковид-19 и лица кои биле во контакт со заболени .
„Државниот инспекторат за труд, во истиот период спроведе 409 надзори во правни субјекти на територијата на целата држава со фокус на почитување на протоколите во насока на заштита на здравјето на вработените. При овие надзори, од страна на трудовите инспектори донесени се 17 решенија кои се однесуваат на утврдени неправилности од областа на работните односи“, информираше денеска на прес-конференција претседателката на Инспекцискиот совет Магдалена Филиповска Грашковска.
Инспекторат за транспорт, пак, при 48 надзори, изрекол 2 кривични пријави за непочитување на здравствениот протокол за меѓународен превоз на патници на граничниот премин Деве Баир, како и 4 прекршочни пријави, 5 решенија и 9 платни налози по основ на прекршување на материјалните закони ( Закон за превоз во патен сообраќај, Закон за време на мобилните работници и Законот за превоз на опасни материјали).
Во истиот период, МАЛМЕД спровел 60 надзори во аптеки по основ почитување на мерките на Владата на РСМ и издавањето на антибиотици, при што не биле констатирани прекршувања на законските одредби и отстапувања од протоколите.
„Агенцијата за храна и ветеринарство, во периодот од 5-ти до 11-ти октомври 287 надзори. При тоа издадени се 5 решенија , 2 платни налози и 40 едукации за неизвршени здравствени прегледи, неводење на записи за хигиена, неспроведување на општи хигиенски мерки“, рече Филиповска Грашковска.
Таа потсети дека неодамна Владата ги усвои измените на Законот за заштита на население од заразни болести. Со овие измени сите инспекциски служби добиваат нови, поголеми овластувања за справување со прекршителите на ковид протоколите.
Досега само Државниот здравствен и санитарен инспекторат имаше овластувања да изрекува мерки, а другите инспекциски служби само поднесуваа кривични пријави за непочитување на протоколите согласно Кривичниот законик.
„Со новите законски измени вакво овластување за изрекување на забрана за работа и прекршочен платен налог добиваат и Државниот пазарен инспекторат, Државниот инспекторат за труд, Државниот инспекторат за транспорт и за другите инспекторати на централно и локално ниво“, посочи Филиповска Грашковска.
Конкретно, доколку инспекторите утврдат прекршување на здравствените протоколи, ќе имаат овластување на лице место да изречат привремена забрана за вршење на дејноста од 10 до 30 дена на правните субјекти кои не ги почитуваат мерките. Дополнително според новите висината на глобите ќе варира во зависност од големината на правниот субјект.
„Законските измени се веќе пратени во Собрание, штом бидат изгласани и објавени во Службен весник, инспекторите веднаш ќе започнат да постапуваат според новите овластувања“, најави претседателката на Инспекцискиот совет.
„Би сакала да потенцирам дека ова е заедничка битка, и мора сите да придонесеме за спречување на ширење на коронавирусот. Затоа е важно да се почитуваат сите здравствени протоколи. Како инспекциски служби, правиме максимални напори, да ги минимизираме можностите за ширење на коронавирусот во големите и средни производни капацитети, трговски објекти, кафетерии и угостителски објекти кои послужуваат храна, банки, пошти, аптеки, обложувалници и во сите други правни лица кои обавуваат било каква дејност“, апелираше Филиповска Грашковска.
Таа истакна дека инспекциските служби ќе бидат на терен постојано низ земјата и ќе го следат правилното почитување на владините протоколи.