Иницијативата за правата на лицата со посебни потреби „5до12“, реагира на изјавата на Министерката за труд и социјална политика Мила Царовска, која вчера истакна дека работите кои ги разговарале веќе се преточени во законски текст и дека е во постојана комуникација со претставници на иницијативата.
Фактичката состојба, велат од иницијативата, е дека „ниедно од барањата не е соодветно преточено во законски или подзаконски акт“.
„Граѓанската иницијатива „5до12“ и нејзини претставници, досега не учествувале во креирањето на програмата и воопшто во креирање на политиките на Министерството кои се однесуваат на лицата со посебни потреби“, велат тие преку соопштение.
„Од последниот камп па наваму, се одржа само во една работна група, на 22 Јуни 2017 година, на која беше присутен претставник на иницијативата, и на која беа изложени барањата и проблемите на лицата со посебни потреби“, додаваат од „5до12“.
Министерката Царовска вчера изјави дека секојдневно работат на унапредување на правата на лицата со попреченост и овој месец се направени многу работи во оваа област, додавајќи дека се надева на понатамошна партнерска соработка со граѓанската иницијатива за најдобри промени во интерес на децата и лицата со попреченост:
„Во моментов се гради центар за поддршка на дечиња со Даунов синдром. Во моментов, со законот предвидуваме персонална асистенција, што досега, во закон за социјална заштита никогаш не било предвидено. Ние не можеме утре да имаме персонални асистенти, ако немаме законски основ и ако ние навистина немаме стандарди и протоколи во однос на персонална асистенција. Навистина сметаме дека и онаа мерка која што им ја нудиме во законот сега, а тоа е посебниот додаток да преминува во додаток за туѓа нега директно, без да поднесуваат барања, а исто така, за посебниот додаток, ja острануваме како бариера (обврската) секоjа година да мора да поднесуваат соодветна документација- сето тоа е олеснување за родителите. Дополнително, со Mинистерството за здравство комуницираме за конзилијарното мислење за туѓа нега да се укине. Со тоа се штедат средства на секое семјство, но исто така шетањето од институција во институција“, изјави Царовска.
Од иницијативата „5до12“ до Министерката уште еднаш порачаа „Ништо за нас, без нас“, додавајќи дека нудат и бараат про-активно и долгорочно учество во креирање на политиките, реализирање и супервизија на проектите кои се однесуваат на лицата со посебни потреби.
Во врска со изградбата на центарот за Даунов синдром од иницијативата велат дека тој мора да биде по светски стандарди и да подлежи на консултација и ревизија од родителите и здруженијата за поддршка на овие лица. За персоналните асистенти, кои според нив се потребни во сите сфери на оштественото живеење, порачуваат дека треба да бидат способни да одговорат на потребите на корисниците, односно да посетат обуки и да се специјализираат за работа со различни категории на попреченост.
Претходниве два дена иницијативата „5до12“ по четврти пат протестно кампуваа пред македонското Собрание со барања за поголеми социјални, образовни и здравствени права на лицата со посебни потреби.