Здружението на граѓани „Младите можат“ организира настан за поттикнување на социјалната вклученост на млади со попречен вид, симболично насловен „На кафе зад превезот“. Настанот почнува во 20:00 часот, во локалот „Децата од нашата улица“ во Дебар маало.
Целта на настанот е да се разбуди свеста на луѓето за животот на младите со оштетен вид и потребата за нивна поголема социјална инклузија.
– Во склоп на настанот ќе се одржи симулација на која учесниците ќе имаат превез на очите со што би го искусиле секојдневното функционирање на младите со попречен вид и би се ставиле „во нивни чевли”, соопшти организаторот.
Настанот е дел од проектот „Младински лидерски иницијативи“, реализиран од „Младите можат“ во партнерство со „Симбиотика“ и со поддршка од програмата „ЦИВИКА Мобилитас“.