Инцидент на прославата на Мечкин Камен, навивачи со пластични шишиња и пцовки кон владината делегација

Пластични шишиња, свирежи и говор на омраза беа упатени денеска кон владината и собраниската делегација, како и кон дел од дипломатскиот кор во Македонија кои присуствуваа на одбележување на Илинден во Крушево.

Група навивачи предизвика скандал за време на доаѓањето на делегациите, а по завршувањето на манифестацијата тргнала кон претставниците на Владата, но била спречена од полициското обезбедување.

На Мечкин Камен денеска присуствуваа вицепремиерот Кочо Анѓушев, министрите за транспорт и врски, информатичко општество и администрација, локална самоуправа и за здравство, Горан Сугарески, Дамјан Манчевски, Сухејл Фазлиу и Венко Филипче. Меѓу дипломатите беа амбасадорите на САД и на Русија, Џес Бејли и Олег Шчербак.

Со овации и аплауз, пак, беше пречекан претседателот Ѓорге Иванов, кој со својот говор се спротивстави на договорот со Грција за промена на името и за референдумот.

Навивачката група упати говор на омраза кон Албанците, извикувајќи погрдни зборови. Дел од медиумите пишуваат дека држеле платно со ликот на Никола Саздовски – Саздо, кој беше претепан до смрт пред еден месец во Скопје.

Градоначалникот на Крушево, Томе Христоски преку Фејсбук се огради и го осуди говорот на омраза на чевствувањето на државниот празник.

„Група луѓе дојде да манифестираа агресивност, незадоволство, особено кон поканетите гости токму од Ѓорѓе Иванов, амбасадори како што беше рускиот, италијанскиот, американскиот Џес Бејли и Метрју Палмер, третиот човек по ред од администрацијата на претседателот Трамп, владината делегација на Македонија.

Тоа што се случи денес не е одлика ниту на илинденците во Илинденското востание кои се бореа за слобода, правда, еднаквост, ниту истото било пишано во Крушевскиот манифест, а најмалку тоа требаше да го направи човек кој е поставен на функција претседател на Македонија кој треба да ги штити и застапува интересите на сите граѓани.

Тоа ти е исто како да каниш некој гостин на слава и без причина да го натепаш.

Затоа се оградувам, им се извинувам на гостите од мое име и од име на општина Крушево, особено на оние кои беа поканети на чествувањето на празникот на Мечкин Камен, а беа испратени на најниско ниво од страна на организаторот институцијата претседател на Македонија, несоодветно со пцовки, урликања, па дури беше фрлано со предмети и камења кон нив, на што изреагирав, демонстративно станав и заминав од Мечкин Камен“, напиша Христоски.

Од Министерството за внатрешни работи најавија дека ќе испитуваат кој го предизвикал инцидентот.