Во Кино Фросина вечерва (7 декември) од 20 часот премиерно ќе биде изведена претставата „Хумана приказна” од Кaтерина Момева во режија на Бесфорт Идризи.
Претставата е дел од проектот „Мој Омбудсман – театарот како метод за зголемување на основните човекови права“, во продукција на „Онлимит медиа“ во партнерство со Народниот правобранител.
Целта е да ги запознае граѓаните. пред сè младите и жените, за надлежностите на институцијата Народен правобранител, да го зголеми присуството на Правобранителот во руралните подрачја и да ги промовира професионалноста, експертизата и транспарентноста на Канцеларијата на Народниот правобранител.
„Со оваа претстава што е тријазична (со титли за гледачите) и ги опфаќа македонскиот, албанскиот и турскиот јазик, и со начинот на кој ќе се прикажува ширум државата, покривајќи повеќе различни општини и региони, се надеваме да дадеме позитивен импулс кон информирањето на граѓаните за надлежностите на институциите, снабдувајќи ги со дополнителни информации, промовирајќи ја институцијата Народен правобранител првенствено пред младите луѓе и жените, зголемувајќи го присуството на Правобранителот во руралните подрачја и промовирајќи ги професионализмот, експертизата и транспарентноста на Канцеларијата на народниот правобранител што несомнено ќе значи нејзино придвижување кон поголема самостојност и кон стекнување на поголема доверба меѓу граѓаните“, посочуваат организаторите.
На крајот на претставата публиката ќе има можност да учествува во дискусија со Народниот правобранител. Влезот е бесплатен а претставата во следните недели ќе гостува и во Крива Паланка (14-ти декември), Битола (15-ти), Тетово (19-ти), Куманово (21-ви), Велес (22-ри), Гостивар (23-ти), Свети Николе (25-ти), Неготино (26-ти) и Кочани (27-ми декември).