Истакнати членови на иницијативата ,,Во име на семејството‘‘ деновиве се повикани на разговор во седиштетот на национално-полицискиот USKOK (PNUSKOK), а исто така пред обвинител ќе се појави и претседателката на иницијативата Жељка Маркиќ, пишуваат хрватските медиуми.
Иницијативата „Во име на семејството“ со нејзината лидерка Жељка Маркиќ ја водеа кампањата за забранување на геј браковите во Хрватска, која доведе до промена на хрватскиот Устав во кој беше внесена одредба со која бракот се дефинира како заедница помеѓу еден маж и една жена.
Од извори блиски до истрагата, хрватскиот „Jutarnji list” дознава дека информативните разговори всушност се поврзани со аферата ,,Аграм‘‘, односно истрагата поврзана со загребскиот градоначалник Милан Бандиќ и неговите најблиски соработници.
Како што дознаваат од весникот, обвинителот се обидува да ја докаже врската помеѓу Бандиќ и соработниците или Жељка Маркиќ и другите членови на иницијативата. Дали станува збор за сомнителни донации или некое друго казниво дело, досега не е познато.
Финансирање на кампањата
Можеби, обвинителот е заинтересиран конкретно за финансирање на кампањата на оваа иницијатива за собирање на потписи за т.н. ,,анти-геј референдум‘‘, односно за референдумот за бракот како заедница помеѓу еден маж и една жена. Имено, за разлика од транспарентно спроведената акција за собирање на потписи околу изборот на пратеници, позади акцијата која требаше да резултира со уставно дефинирање на бракот како заедница помеѓу маж и жена останаа некои отворени прашања. Иницијативата за тоа, никогаш не посочи директно кои се донаторите кои ја покриваа големата акција на собирање потписи низ цела Хрватска.
Медиумот шпекулира дека веројатно PNUSKOK располага со информации кои може да бидат поврзани со Милан Бандиќ, кој воедно повеќе ја поддржуваше работата на ,,Во име на семејството‘‘. Така, на оваа иницијатива и‘ беше доделен простор во сопственост на градот Загреб, користен како канцеларии, а исто така на плакатите за распишување на референдум беше наведено дека оваа акција ја поддржува градот Загреб.
За целата оваа ситуација, јавноста беше известена од страна на самата Иницијатива, од каде што тврдат дека се работи за некаков институционален притисок на нивните активисти. Правниот застапник на Иницијативата, адвокатот Крешимир Планиниќ, рече дека овие денови повеќе членови на Иницијативата се повикани на разговор кај обвинителот. За што поточно се работи, односно околу што PNUSKOK води истрага, тој не сакаше да открие. На отвореното прашање за тоа дали информативните разговори се поврзани со аферата ,,Аграм‘‘, Планиниќ одговора дека таа информација не може ниту да ја потврди ниту да ја демантира, додавајќи дека тоа не би можел да го направи дури и кога би ,,знаел за што се работи‘‘. Адвокатот Планиниќ, во тој правец, само информираше дека овие разговори се водат во склоп на предистражната постапка, а по налог на јавното обвинителство.
Заплашување на активисти
– Заклучуваме дека се работи за обид за вршење притисок од страна на државните институции, врз членовите на Иницијативата и граѓанските активисти, обид за притисок на активисти кои поставуваат прашања како што се – како е возможно во Хрватска да има 3.5 000 000 граѓани и 4 000 000 гласачи, изјави Жељка Маркиќ на прес-конференцијата. Планиниќ објаснува дека членовите (за кои не се знае колку од нив досега се повикани на информативни разговори) не можат да изнесат детали за разговорите, заради тајноста на истрагата. Но и самиот тој, тврди дека не гледа други причини за тие разговори, освен вршењето на притисок на Иницијативата. Но сепак, дали можеби PNUSKOK врши истрага околу неправилностите во функционирањето на ова здружение?
– Нашето работење е транспарентно, сите финансиски извештаи се предадени и папирологијата е чиста. Сите институции кои се занимаваат со тоа, имаат увид во целокупното наше финансирање и друго работење – изјавува Планиниќ.
,,Никој од нас не е осомничен‘‘
Иако адвокатот нагласи дека не може да говори за содржината на истрагата, Планиниќ истакнува дека никој од членовите на Иницијативата ,,Во име на семејството‘‘ не е повикан од обвинителството во својство на осомничен, напоменувајќи дека сите се појавиле на тие информативни разговори. А истото се однесува и на Жељка Маркиќ. ,,Тоа ќе го стори и госпоѓата Маркиќ‘‘ – изјави адвокатот, ден пред да биде повикана и Жељка Маркиќ на сослушување.
Извор: jutarnji.hr, lgbti.mk