Тројца бегалци ги загубија животите во Сува река кај Гевгелија, продолжува праксата на кршење на правото на азил, се бележи зголемен број на заразни болести и вошки во Табановце каде е пријавен и случај на семејно насилство. Ова се дел од забелешките кои ги нотира извештајот на Хелсинчкиот комитет за човекови права за состојбата со бегалците на граничните премини во Гевгелија и Куманово минатата недела.
Од Хелсиншки потсетуваат 14 март, кога загинаа три лица од дваесетчлената група бегалци од Авганистан и Иран што се обиделе преку Сува река за влезат во Македонија.
„Поголем дел од групата (околу 20 бегалци) беа извлечени и згрижени во приемниот шатор во кампот, меѓутоа три лица го загубија својот живот, од кои две жени (едната бремена) и еден маж. Телата беа идентификувани од малолетно дете кое било член на семејството. Околу четири лица беа пренесени во болница, каде што им била укажана медицинска помош, а подоцна се вратени во кампот. Два дена подоцна, поголем дел од групата е депортирана на грчката страна, освен едно семејство чиј член бил хоспитализиран. Симптоматично е што неколку лица од групата, се изјасниле дека сакаат да побараат азил во Република Македонија, но нивното барање било игнорирано и не им било овозможено. Подоцна тие биле депортирани во Грција, заедно со останатите кои изразиле таква желба“, забележуваат од Комитетот.
Оттаму опоменуваат дека игнорирањето на барањата за право на азил е кршење на правата на бегалците и строго ги повикуваат надлежните во итна постапка и без одложување да му го озозможат побарувањето азил во земјава. Во делот за Гевгелија се посочува и дека во текот на минатата седмица не е издадена ниту една потврда за искажана намера за барање азил.
Бројката на бегалци во пак Табановце се намалува, поради разотидување на групите надвор од кампот, во непознати правци и сега изнесува околу 1350 лица, стои во извештајот. Во него се додава дека условите во кампот се лоши и се појавуваат случаи на вируси, заразни болести и вошки. Хелсиншки забележува дека има зголемена нервоза и агресивност кај бегалците кои често консумираат алкохол што го набавуваат од околните села. Во кампот изминатата недела е пријавено исчезнато лице, девојка со ментална попреченост. Во друг случај пак, мајка со три деца пријавила кај полицијата дека нејзиниот сопруг физички ги малтретирал, нејзе и децата по што било упатено предупредување од полицијата до насилникот.