Графит посветен на мирот ги покри пораките со говор на омраза на еден од ѕидовите во Старата скопска Чаршија. И самиот графит е насловен „Ден на мирот“,по повод 21 септември.
Го направија Валон Кучи и Јетмир Асани, во соработка со здружението „Мировна акција“ од Прилеп.
Како што раскажува Кучи, за Радио МОФ, целта им било да пренесат една порака за мир и да ги покријат нацистичките симболи и пораките со говор на омраза, кои го грделе овој дел на Чаршијата.
„Сакаме секој кој сега ќе помине низ Чаршијата, да го забележи графитот и да ги прифати пораките за слобода, правда, мир, еднаквост. Сакавме со овие, да ги покриеме грдите пораки од претходно“, вели Кучи.
Тој посакува и улицата на која е нацртан нивниот графит, од „Градишка“, да се преименува во „Улица на мирот“, за да праќа позитивна порака за сите кои ќе минуваат по неа.