Марко Трпески е графички дизајнер од Скопје чии дела ги сретнавме на Инстаграм профилот „Метафора“ (@metaforadesign). Преку него споделува илустрации кои се занимаваат со психо-социолошки феномени.
„Но, ако огледало на личноста е тоа што е нејзино дело, тогаш веројатно не можам да се сметам себеси само за графички дизајнер, иако графичкиот дизајн е моја азбука и дава интерпретативна вредност на мојата потреба за креативни авантури. Па, ајде да речеме дека сум неуморен трагач по интересни состојки за креирање метафори и симболи и непоправлив идеалист во успешноста на експериментот за создавање сопствен микс реалност“, вели тој за Радио МОФ.
„Метафора“ за него претставува креативен експеримент, кој сублимира суштини и емоции, лични и општествени, и црпи инспирација најчесто од реалноста. Како што вели, се обидува да создаде визуелизации зад прагот на свесното, па да ги интерпретира во надреалистички, речиси апстрактни слики, кои со себе носат најчесто повеќе прашања одошто одговори.
Но, покрај споделувањето на своите илустрации, тој работи и на линијата „Шо има врска“ (@shoimavrska.shop), која настанала со пријателски сили од најекстремните моменти во пандемијата, или како што вели Трпески „кога најголем дел од нас се одминуваа со спуштени погледи без да си кажат ни збор“.
„Иако со акцент на шегата, жаргонот и маалските фори, „Шо има врска“ треба да развеселува, но и да зборува… Затоа што треба да си ги кажуваме нештата, колку и да изгледаат банално… зашто добриот збор железна врата отвора, а добрата фора па да не праиме муабет“, забележа тој.
Трпески е уште еден графички дизајнер кој се приклучува на нашата иницијатива #ИнстаИлустрации. Во продолжение, погледнете дел од неговите илустрации:
View this post on Instagram
View this post on Instagram
View this post on Instagram
View this post on Instagram
View this post on Instagram