Шефот на Светската здравствена организација (СЗО) е оптимист дека пандемијата на коронавирусот ќе биде победена во 2022 година, под услов земјите да работат заедно за да го задржат нејзиното ширење, пишува Гардијан.
Тедрос Аданом Гебрејесус предупреди против „национализмот и трупањето вакцини“ во новогодишната изјава.
Неговите коментари доаѓаат две години откако СЗО првпат беше известена за случаи на непознат вид пневмонија во Кина.
Глобалните случаи на ковид сега изнесуваат 287 милиони, додека скоро 5,5 милиони луѓе починале.
Низ светот луѓето ја одбележуваат новата година, но прославите се ограничени, а многу земји го обесхрабруваа собирањето на толпи.
Коронавирусот останува дел од секојдневниот живот: болест која ги затвори границите, ги подели семејствата и на некои места го направи незамисливо излегувањето од куќата без носење маска.
И покрај сето ова, Гебрејесус звучеше позитивно во својот говор, истакнувајќи дека сега има многу повеќе алатки за лекување на Ковид-19.
Но, тој предупреди дека континуираната нееднаквост во дистрибуцијата на вакцините го зголемува ризикот од развој на вирусот.
„Национализмот и трупањето вакцини од страна на некои земји ја поткопаа правичноста и создадоа идеални услови за појава на варијантата омикрон, а колку подолго продолжува нееднаквоста, толку се поголеми ризиците вирусот да се развива на начини на кои не можеме да ги спречиме или предвидиме“. тој рече.
„Ако ставиме крај на нееднаквоста, ќе ставиме крај на пандемијата“, додаде тој.
Во своите коментари, Гебрејесус, исто така, алудираше на ниските стапки на вакцинација.
Додека поголемиот дел од населението во Европа и Америка прими најмалку една доза, целта на СЗО за целосна стапка на вакцинација во 40% од секоја земја до крајот на 2021 година е пропуштена низ поголемиот дел од Африка.
Гебрејесус претходно ги критикуваше побогатите нации дека го „голтаат“ глобалното снабдување со вакцини, целосно вакцинирајќи голем дел од нивната популација додека другите ги чекаат првите дози.
СЗО постави нова цел за 2022 година: да се вакцинираат 70% од луѓето во сите земји до јули за да се стави крај на пандемијата.