[Галерија] Асфалтот „изеде“ уште еден дрворед – утринава во 6 исечени липите на „Железничка“

Работници ангажирани од Град Скопје утринава околу 6.00 часот ги исекоа липите од едната страна на улицата „Јордан Мијалков“ (поранешна „Железничка“), како дел од проширувањето на улицата.

Како што веќе информиравме, а од Градот и потврдија за „Вест“, во следниот период оваа улица треба да се прошири и повторно да стане двонасочна, за да го преземе сообраќајот од Јужниот булевар, кој ќе биде затворен поради изградба на подземна сообраќајница. Дрворедот од левата страна, во правец на Кисела Вода, настрада по речиси целата должина – од приклучокот кај Рамстор и Клиничкиот Центар, до средното фискултурно училиште. 

Изминативе неколку години, поради градежни зафати е исечен голем дел од дрвјата во центарот на Скопје, а експертите велат дека ова е еден од факторите кои влијаат на се поголемото загадување на воздухот во главниот град.