Споменик во чест на гравот беше поставен во село Теарце, Тетовско. Споменикот беше изработен од Љубиша Камењаров, чија замисла била да креира спој на традиционален и модерен уметнички израз.
Тој од една страна го претставува гравот како долговековна и автохтона култура најпозната и далеку прочуена од овој крај, а од друга страна, како уникатен и перспективен македонски земјоделски производ со голем потенцијал за развој и доходовност.
Споменик е поставен во склоп на манифестацијата „Ден на гравот” која 10 години по ред се одржува во Теарце, во организација на Центарот за едукација и развој- ЦЕД и бројни партнери и поддржувачи од земјата и странство.
„Оваа година со цел почитување на мерките од пандемијата Ковид-19, сакавме на еден начин да го оддржиме актуелно настанот и тоа што најмалку можевме да направиме, без да се загрпозат животите на сите граѓани кои веќе се навикнати да придонесат и уживаат во овој веќе традиционален настан, решивме да се постави уметничка инсталација на јавен простор. Според нас, и во овие времиња треба да се негува уметноста, бидејќи без неа и култура станува тивка“, вели Метин Муареми, претседател на ЦЕД.
Настанот секоја година собира над 500 посетители од различни генерации, националности, религии и географски подрачја.
На тој ден се готват и дегустираат разни јадења приготвени од грав, се изведуваат музички точки и танци од страна на културно уметнички друштва и музички групи.
Настанот има за цел да го промовира и ја потенцира вредноста на далеку прочуениот тетовски грав како агрокултурна вредност подеднакво важна за сите жители во регионот. Но, и да поттикне повеќе млади да се занимаваат со производство на грав.